Das armlose Christkind

Das ist ein Erbstück Wilhelm Will (+ 1996), dessen Frau Elisabeth Will-Kihm Ihr sicher kanntet. Ich halte es in Ehren, so wie er. Ich muss einfach immer, wenn ich das Kind anschaue, an die Aussage denken, dass Jesus keine anderen Hände hat als unsere...

Frieher sin die Weihnachtsbeem oft bis Lichtmess stehe geblibbe. Die Weihnachts-Festzeit geht jo aach mit ihrm 40. Daag zu End, wo die Eltern de klaa ne Jesus in de Tempel mitgenomme habbe. De Bub is beschnitte worn, sei Mama hot nooch de Geburt en „Reinigungsopfer“ dargebrocht un de erstgeborne Bub is Gott geweiht worn.

Mir „Pilger der Hoffnung“ (2025) stehe jetz im Jahr mit dem Motto „Friede sei mit Euch“. Wer spricht uns den zu? Die Engel, wo dene Hirte saage, se solle des Kind in de Kripp suche gehn.

Zwaa vun unsere Gemeindemitglieder, mein Freund un friehere Religionslehrer Wilhelm Will (1931-1996) un sei Fraa, unser Historikerin Elisabeth Will-Kihm (1930-2010) habbe mer so en Jesuskind hinnerlosse. Wie mer sieht, hots kaa Ärmcher.

In welcher Kripp des wohl mo geleje hot? Manchaaner hätt's fortgeschmisse; die zwaa nit. Als dief gläubische Mensche habbe se gewusst, was uns so en „beschädigt“ Krippekind saage kann un will. Die Heilisch Teresa vun Ávila (1512-1582) soll nämlisch gesaat habbe: „Christus hat jetzt keinen anderen Leib als euren, keine anderen Hände außer euren. Eure Augen sind es, durch die Christi Erbarmen auf die Welt schaut. Mit euren Füßen geht er umher und tut Gutes. Mit Euren Händen will er uns jetzt segnen.“

De Heiland hot als Wickelkind aagefange, wie mir. „Macht hoch die Tür“ habbe mer gesunge, un „o komm mein Heiland“ – for den Mensche wo alles heil, also ganz un gesund mache un rette soll!

Die Grieche habbe so en Retter „soter“ genennt un den Beiname aach manche Schutzgötter un Herrscher gebbe. So en Herrscher war de römische Kaiser Octavian, der wo später Augustus genennt worn is. Augustus? Klar, des war doch der mit de Volkszählung im Weihnachtsevangelium beim Lukas, des mer all im Ohr habbe!

Weeche der sin de Josef un die hochschwanger Maria no Bethlehem gereist. Wie de klaa Jesus dann geborn war, is en hellstrahlende Engel bei de Hirte uffgetaucht un hot dene „eine große Freude“ aagesaat: „Denn heute ist Euch der Heiland geboren, welcher ist Christus (der Messias), der Herr...“ – un er verkündischt „Friede auf Erden“.

Wunnert's uns jetz, dass do im griechische Neue Testament, aus dem de Luther übersetzt hatt', for de Heiland „soter“ steht? En klaane „Hosematz“, am Rand vum große Römerreich in de besetzte Provinz, krieht vun dem Lukas seine Engel, also Gottesbote, die Titel, wo der große Augustus for sich beaasprucht hot – Erlöser, soter, un obbedrei kyrios, Herr!

Des is en Provokation! Der Dichter Vergil besingt übberichens de Kaiser als kyrios, wo mit seiner Ankunft (adventus!) en Friedensreich errichte deht! For dem Kaiser sein Eizug in Rom habbe die Römer uff ihr Art „hoch die Tür“ gemacht – se habbem en Triumphbooche gebaut. Dass der „Friedensbringer“ Augustus en Kriegsmann war un sovill annerleits Blut vergosse hot, is der große Geechesatz zum Jesus, wo am Kreuz nur sei eige Blut vergieße sollt....

Ville Jahrn später musste die Römer ihrne vergötterte Kaiser Weihrauch opfern. Gar manche Christemensche, wo geglaabt habbe, dess ihrn wahre Herr, Erlöser un Friedensfürst des klaane Kind, der am Kreuz umgebrachte Jesus aus de Provinz wär, habbe sich geweigert un des mit ihrm Lebe bezahlt.

Wann der Friede mit un unner uns sei soll, brauche mer offene Herzensdürn for all unser Liebe un for den klaane Erlöser. Des wollt ich zum Abschluss vun de Weihnachtszeit nochemol gesaat habbe un wünsch uns all, dess unser Mitmensche an uns sehe un erlebe könne, wie un warum mer dem armlose Krippekind glaabe.

Leo Gros